නිවේදක වෘත්තියට පිවිසුමක්

නිවේදකයෙකුට මූලික වශයෙන්‌ ම හඬක්‌ තිබිය යුතු ය. ගුවන්‌ විදුලියේදී එයට අප කීවේ මයික්‍රෆෝනයට සුදුසු හඬක්‌ කියා ය. එහෙත්‌, හඬ පමණක්‌ තිබීම ප්‍රමාණවත්‌ නොවේ. හඬට අමතරව ඔහුට හෝ ඇයට ආකර්ෂණීය ඉදිරිපත්‌ කිරීමේ ශෛලියක්‌ තිබිය යුතු ම ය. එවිට ඒ ඔස්සේ තමන්ට ම අනන්‍ය වූ ප්‍රතිරූපයක්‌ ගොඩනගා ගැනීම පහසුවනු ඇත. අනාගතයේදී නිවේදක නිවේදිකාවන්‌ වීමට බලාපොරොත්තු වන්නේ නම් ඔබ බොහෝ කරුණු ගැන දැනුවත්‌ වීම අවශ්‍ය ය. නිතිපතා දැනුම යාවත්කාලීන කරගත යුතු ය. මේ කරැණු අධ්‍යයනයට විෂයානුබද්ධ පොතපත කියවීමද යහපත්‌ ප්‍රතිඵල ගෙන දෙන්නකි. නමුත්‌ අවාසනාවකට, අප රටේ මෙම විෂය ගැන සිංහලෙන්‌ ලියැවුණු පොතපත අල්ප ය. තිබුණත්‌ සමහර පොත්‌ තුළින්‌ සාරවත්‌ කරැණු උකහාගත නොහේ. මේ හිදැස ඉතා හොඳින්‌ සපුරාලන, සරල සිංහලෙන්‌ ලියැවුණු පොතක්‌ ලෙස, ජ්‍යෙෂ්ඨ මාධ්‍යවේදී ශ්‍රී නිමල්‌ පද්මකුමාර ලියූ “නිවේදක වෘත්තියට පිවිසුමක්‌” ග්‍රන්ථය හඳුන්වා දීය හැක.